ПЕШГИРИИ ПАҲНШАВИИ БЕМОРИҲОИ СИРОЯТӢ

Кӯлоб, 24 сентябр. (АМИТ «Ховар», Сулаймон Холов).- Бо мақсади пешгирӣ намудани бемориҳои сироятӣ дар Ҷумҳурии Тоҷикистон аз ҷониби ҳукумат барномаҳои гуногуни давлатӣ қабул гардида, барои татбиқи амалии ин барномаҳо ташкилотҳои байналмиллалӣ ҷалб мешаванд. Дар маркази шаҳри Кӯлоб мизи мудаввар  зери барномаи «Аутрич дар ҳифзи саломатӣ» доир гардид, ки дар он кормандони соҳаи тандурустии минтақа, ҳифзи ҳуқуқ, рӯзноманигорон ва намояндагони ташкилоти ҷамъиятӣ иштирок намуданд. Бояд қайд намуд, ки паҳншавии бемориҳои сироятӣ дар Ҷумхурии Тоҷикистон нисбат ба дигар давлатҳои ҳамсоя кам ба қайд гирифта шудааст ва пешгирӣ аз паҳншавии он зери назорати вазорати тандурустӣ қарор дорад. Барномаҳои гуногуни давлатие, ки барои пешгирӣ намудани бемориҳои сироятӣ қабул гардида, татбиқ карда мешаванд, дар ҳамаи шаҳру ноҳияҳо амал мекунанд, ва барои натиҷагирӣ аз фаъолияти барномаи «Аутрич дар ҳифзи саломатӣ» дар шашмоҳаи аввали соли 2010 дар шаҳри Кӯлоб мизи мудаввари мазкур гузаронида шуд. Ба гуфти масъулин чунин мизи мудаввар дар дигар шаҳру ноҳияҳо низ гузаронида шуда, фаъолияти барномаи мазкур натиҷагирӣ  мешавад.