РӮЗИ ИДИ САИДИ ФИТР МУАЙЯН ШУД

         Душанбе, 6 сентябр. (АМИТ «Ховар», Марзия Саидова).- Иди саиди Фитр дар Ҷумҳурии Тоҷикистон чун дар дигар кишварҳои мусулмонӣ мувофиқи ҳисоби тақвимӣ 10 сентябри соли 2010 ҷашн гирифта мешавад. Дар  ин хусус ба АМИТ «Ховар» мудири шӯъбаи фатвои Шӯрои уламои ҷумҳурӣ Қобилҷон Боев иттилоъ дод. Мавсуф зикр кард, ки қарори марбутаи таҷлили Иди саиди Фитр дар рӯзи 10 сентябр дар  ҷаласаи васеи Шӯрои уламои кишвар, ки бо ҳузури  намояндаи дастгоҳи иҷроияи Президенти ҷумҳурӣ, кормандони Кумита оид ба корҳои дин,   сархатибони вилоятҳои Суғду Хатлон, имомхатибони шаҳру ноҳияҳои ҷумҳурӣ баргузор шуд, тасдиқ гардид. Яъне,  бо Қарори Шӯрои уламои ҷумҳурӣ 10 сентябр соати 8-субҳ дар тамоми масҷидҳои ҷомеаи кишвар намози иди саиди Фитр хонда мешавад.           Ба бар намудани пироҳани наву зебо, шоду хурсанд будан, ҳадя кардан ва хабар гирифтан аз аҳволи беморону барҷомондагон,  камбизоатону ятимон, зиёрати оромгоҳи гузаштагон,  яке аз фазилатҳои  неки ин иди муборак  ва кори хайру савоб аст.         Мудири шӯъбаи фатвои Маркази исломии Тоҷикистон афзуд,  шахсе, ки дар моҳи шарифи Рамазон рӯза доштааст,  бояд садақаи фитрро адо намояд, то рӯзаи ӯ ба даргоҳи Худованд қабул гардад. Шахсоне ки 15000 сомонӣ доранд,  бояд 325 сомонӣ закот супоранд. Садақаи фитр дар моҳи Рамазон ба ҳар сари як нафар аъзои оила ба арзиши  1кг 600 грамм гандум муайян шудааст, ки он ба 2 сомонӣ баробар аст.