ШИШАҲОИ НАВИ «КАЙҲОНСОХТ»

Душанбе, 27 сентябр. (АМИТ «Ховар», Назокат Қодирова). — Дар ноҳияи Рӯдакӣ корхонаи нави истеҳсоли шишаҳои пластикии рангаи ба ҳама шароит тобовар ба истифода дода шуд. Корхона «Кайҳонсохт» ном дошта, дар якҷоягӣ бо соҳибкорони Ҷумҳурии Халқии Корея бунёд гаштааст. Хати технологӣ ва таҷҳизоти ин коргоҳи истеҳсолкунандаи маводи пластикӣ замонавӣ буда, дар он шаҳрвандони Ҷумҳурии Тоҷикистон ва Ҷумҳурии Корея дар ду баст маҳсулот истеҳсол менамоянд. Маҳсулоти коргоҳ гуногунтамғаю гуногунҳаҷм буда, бо сифати баланд истеҳсол мешавад. Ин корхонаи муштарак ба маблағи 900 ҳазор доллари ИМА сохта шудааст. Айни замон дар ин ҷо 40 нафар меҳнат намуда, дар як моҳ аз 1000 то 1500 сомонӣ музд мегиранд. Дар назар аст, ки то ҷашни 20 солагии Истиқлолияти Ҷумҳурии Тоҷикистон хати технологии корхона васеъ гардида, бо шарофати он имкон аст, ки 150 нафар шаҳрвандони дигар соҳиби ҷойи кор ва маоши мувофиқ гарданд. Ёдовар мешавем, ки ин нахустин корхонаи муштараки Тоҷикистону Корея мебошад, ки ба истеҳсоли шишаҳои махсуси пластикии ранга машғул аст.