ТЕЪДОДИ ХОҲИШМАНДОНИ ЗИЁРАТИ ХОНАИ ХУДО АФЗУДААСТ

         Душанбе, 23 сентябр.(АМИТ «Ховар», Марзия Саидова).- Соли равон 172 нафар сокинони ноҳияи Ҳисор маросими Ҳаҷи фарзиро ба ҷо меоранд. Назар ба иттилои  мудири бахш  оид ба корҳои дини Мақомоти иҷроияи маҳаллии ҳокимияти давлатии ноҳияи Ҳисор Хайрулло Давлатов аз 11 август то 1 сентябри соли равон, ки қабули ҳуҷҷатҳои шаҳрвандон ҷараён гирифт,  320 нафар сокинони ноҳия ҷиҳати адои маросими Ҳаҷи фарзӣ бо ариза муроҷиат карданд. Мавсуф афзуд, ки аз 172 нафар сокинони ноҳия, ки ҷиҳати адои  маросими Ҳаҷи Акбар ба қайд гирифта шудаанд, ҳамаи онҳо бори аввал ба зиёрати Хонаи Худо мераванд. Соли гузашта 152 нафар сокинони Ҳисор ба зиёрати Каъбатуллоҳ мушарраф гардида буданд.         Хайрулло Давлатов афзуд, ки ҷиҳати омода намудани шаҳрвандон ба маросими Ҳаҷи фарзӣ нақшаи чорабиниҳо таҳрезӣ шуданд. Тибқи он,  бахши оид ба корҳои дини ноҳия дар ҳамкорӣ бо Шӯрои уламои ноҳия, имомхатибони масҷидҳо  ва роҳбаладон дар масҷиди ҷомеъи ноҳия, воқеъ дар деҳкадаи Тӯда ва намозҳои ҷумъа  сӯҳбату вохӯриҳо гузаронида, шаҳрвандонро ба маросими Ҳаҷи фарзӣ омода месозанд. Ҳамзамон, ҳафтаи оянда дар ин мавзӯъ дар ноҳия семинар гузаронида мешавад, ки дар он масъалаҳои вобаста ба Ҳаҷи Акбар, риояи рукнҳои он ҳангоми адои маросим баррасӣ мешаванд.        Мавриди зикр аст, ки соли равон маросими Ҳаҷи фарзӣ охири моҳи октябр оғоз ёфта, хароҷоти  он барои як нафар 3 ҳазору 191 $ аст. Шаҳрвандони синнашон аз 18 то 80 солаи кишвар ҳуқуқи зиёрати Каъбатуллоҳро доранд.