ВОХӮРИИ ИСТЕЪДОДХОИ ҶАВОН ДАР ШАҲРИ ХУҶАНД

Душанбе, 28 сентябр, (АМИТ «Ховар», Назир Назиров ).-26 сентябри соли ҷори мухбири мо бо Раиси Иттифоқи нависандагони ҶТ Меҳмон Бахтӣ вохӯрд. Зимни сӯҳбат мавсуф изҳор дошт, ки дар арафаи иди «Рӯзи забон» (5 октябр), 28-30 сентябри соли ҷорӣ дар шаҳри Хуҷанд конференсияи истеъдодҳои ҷавон дар вилояти Суғд баргузор хоҳад шуд. Мақсади асосии конференсия дарёфти ҷавонони боистеъдод бо мақсади дар оянда ба Иттифоқи нависандагон қабул кардани онҳо мебошад. Барои гузаронидани конференсия, 27 сентябр ба шаҳри Хуҷанд гурӯҳи шоирон ва нависандагон бо роҳбарии Раиси Иттифоқи нависандагон Меҳмон Бахтӣ, сафар хоҳанд кард. Дар кори конференсия роҳбарони вилоят ва шоиру навмсандагони машҳури минтақа, аз ҷумла сардори шӯъбаи Иттифоқи нависандагони вилояти Суғд Ахмадҷон Раҳматзод, шоирон Нурмуҳаммад Ниёзӣ, Фарзона ва дигарҳо иштирок хоҳанд намуд. Ба нависандагон ва шоирони вилоят Меҳмон Бахтӣ аз номи Вазорати фарҳанг медали «Аълочии фарҳанги Тоҷикистон» супорида ба адибони ҷавон медали «Сухан», ки мукофоти Иттифоқи нависандагони Тоҷикистон мебошад, тақдим карда хоҳад шуд.