ҲОСИЛИ ФАРОВОНИ БАДАХШОН

Бадахшон, 18 октябр. (АМИТ «Ховар», Л. Додо).-Дар ин рӯзҳо дар ҳамаи шаклҳои хоҷагидории ВМКБ ҷамъоварии  тамоми намудҳои зироати ғалладонагӣ  ва маҳсулоти полезӣ босуръат ҷараён дорад.Агар дар навоҳии поёноби рӯдхонаи Панҷ мавсими ҷамъоварии ҳосил анҷом ёфта бошад, дар ноҳияҳои болоӣ ин маърака идома дорад. Тибқи маълумоти Раёсати кишоварзии вилоят имсол  дар майдони 1143 гектар зироати тирамоҳӣ кошта шуд, ки аз ин ҳисоб 1002 гектари  он ғалладона мебошад. Бояд гуфт, ки деҳқонон имсол ҳосили хуби зироати ғалладона рӯёниданд. Ҳосили ҳар гектар ғаллазор ба  17,9 сентнерӣ расид.. Картошкапарварони вилоят низ имсол  аз ҳар гектар 199 сентнерӣ ҳосил ҷамъоварӣ намуданд. Дар пешбурди корҳои саҳроӣ техникаи кишоварзӣ босамар истифода  мешавад,-мегӯяд сардори идораи кишоварзии вилоят Назрӣ Назриев. Дар навоҳии вилоят ҷамъоварии ҳосили бо ранҷ парваридаи марди деҳқон идома дошта, деҳқонон аз ҳар соату лаҳзаи мусоид самаранок истифода мебаранд.