АМНИЯТИ КОРМАНДОНИ ХАДАМОТ ТАЪМИН МЕШАВАД

      Душанбе, 14 октябр.(АМИТ «Ховар», Марзия Саидова).-Дар ҷаласаи навбатии иҷлосияи дуюми Маҷлиси намояндагони Маҷлиси Олии Ҷумҳурии Тоҷикистон даъвати чорум,  лоиҳаи Қонунҳои Ҷумҳурии Тоҷикистон «Оид ба ворид намудани  тағйирот ба Қонуни Ҷумҳурии Тоҷикистон «Дар бораи сарватҳои зеризаминӣ» ва «Дар бораи хадамоти  садамавию наҷотдиҳӣ, сохторҳои садамавию наҷотдиҳӣ ва вазъи ҳуқуқии наҷотдиҳандагон» баррасӣ ва қабул гардиданд.        Раиси Кумитаи ҳолатҳои фавқулодда ва мудофиаи граждании назди Ҳукумати ҷумҳурӣ Ҳабибулло Латифов зимни шарҳи лоиҳаи қонунҳои зикршуда, дар назди вакилони палатаи поёнии парлумон афзуд, ки  ҳадафи таҳия ва қабули ин қонунҳо таъмини амният ва беҳдошти вазъи кормандони хадамоте, ки дар бахши истихроҷи  сарватҳои зеризаминӣ фаъолият мекунанд, ба шумор меравад.