АНДЕШАИ ВОҚЕА ПЕШ АЗ ВУҚӮЪ

Душанбе, 4 октябр. (АМИТ «Ховар», Лаззат Диловарзод).- Ҳодисаҳои табиий дар соли 2010 рухдода, исбот намуданд, ки сабабгори қариб ҳамаи фоҷеаҳо худи одамонанд. Ба гуфти коршиносон, сабабгори асосии фалокат дар марказҳои шаҳру ноҳияҳо ва атрофи он лоиҳасозоне  мебошанд, ки бе дарназар дошти  дигар офатҳои табиӣ  барои сохтмони шаҳракҳо дар марказҳои шаҳру ноҳия, атрофи он  ва шаҳракҳои нави аҳолинишин дар  ҷамоатҳои деҳот иҷозати  нақшаи сохтмони манзилҳои истиқоматиро медиҳанд.    — Имрӯз қариб ҳамаи шаҳракҳои аҳолинишини деҳот дар селроҳаҳо сохта шудаанд ва сохтмони ин гунна шаҳракҳо давом доранд,- мегӯяд муҳандиси сохтмон  Искандар Икромов.    Боис ба ёдоварист, ки солҳои 60 –уми асри ХХ дар натиҷаи боронҳои сел оби ду дара – Бакарон ва Юмси ноҳияи Ваҳдат   дар маҷрои худ сели калонеро ташкил дода, 50 – 60 хоҷагӣ зери сел монд.  Чунин хавф дар роҳи дарёчаҳои Чорбоғ, Мағов ва дарёчаи Ромити шаҳраки Ромити ноҳияи Ваҳдат имрӯз ҳам боқист. Дар ин мавзеъҳои пурхавф беш аз 5ҳазор аҳолӣ ва даҳҳо иншооти ёрирасони хоҷагӣ сохта шудаанд. Дар сурати рух додани ҳодисаҳои табиӣ ва дидани зарари ҷонӣ касе ҷавобгариро ба зимма нахоҳад дошт, ҳарчанд ки аз пайи он ҷавобгарӣ  ҳаст.