БАЗМГАҲИ РӮЗИ ЗАБОН КУҶОСТ?

      Душанбе, 4 октябр.(АМИТ «Ховар», Марзия Саидова).-Бо мақсади дар сатҳи баланд таҷлил намудани Рӯзи забони давлатӣ, ки 5 октябр таҷлил мегардад, дар асоси Қарори Раиси шаҳри Душанбе Маҳмадсаид Убайдуллоев нақшаи чорабиниҳои идона таҳрезӣ гардид.     Тибқи иттилои сардори шӯъбаи фарҳанги шаҳри Душанбе Шаҳло Мӯсоева, 5 октябр дар Боғҳои фарҳангу фароғатии ба номи С. Айнӣ, «Дӯстии халқҳо», «Кӯли ҷавонон»  ва «Майдони 800-солагии Москва»  сайругашти идонаи сокинону меҳмонони пойтахт ва базмҳои шеъру суруд  ташкил гардида, намоиш — фурӯши маҳсулоти кулчагию қаннодӣ, ҳунарҳои мардумӣ ба роҳ монда мешавад.      Шаҳло Мӯсоева афзуд, ки маркази асосии таҷлили Рӯзи забони давлатии Ҷумҳурии Тоҷикистон  дар пойтахт Боғи устод Рӯдакӣ мебошад. Дар ин ҷо бо иштироки донишмандону устодон, забоншиносони варзида, устодони санъат ва ҷавонони эҷодкор чорабинии идонаи шаҳрӣ гузаронида мешавад.         Ҳамчунин, бахшида ба Рӯзи забони давлатӣ дар китобхонаи шаҳрии ба номи Абулқосим Лоҳутӣ таҳти унвони «Забон бақои миллат аст» конфронси илмӣ ва  намоишгоҳи китоб ташкил карда мешавад.        Ҳамзамон,  дар асоси ин қарор кӯчаю хиёбонҳои шаҳр ва биноҳое, ки дар он чорабиниҳо гузаронида мешаванд,  идона оро дода шудаанд, ки ин аз таҷлили бошукӯҳи Рӯзи забони давлатӣ дар пойтахти кишвар-шаҳри Душанбе шаҳодат медиҳад.