БТРА ДАР ТАТБИҚИ ЛОИҲАҲОИ НАВ САҲМ МЕГИРАД

Душанбе, 12 октябр. (АМИТ «Ховар», Бекназари Абӯбакр). – Масоили кунунӣ ва дурнамои вазъи иқтисодӣ ва рушди тиҷорат дар Тоҷикистон, имрӯз зимни мулоқоти вазири рушди иқтисод ва савдои Тоҷикистон Фаррух Ҳамралиев бо Сардори намояндагии Бонки таҷдид ва рушди Аврупо (БТРА) дар Ҷумҳурии Тоҷикистон Улф Хиндстром муҳокима гардид. Аз маркази матбуоти Вазорати рушди иқтисод ва савдо ба АМИТ «Ховар» иттилоъ доданд, ки дар мулоқот оид ба асоснокии санадҳои меъёрию ҳуқуқӣ дар соҳаи лизинг, рушди бахши хусусӣ, дастгирии бахши молиявӣ ва асъори миллӣ мубодилаи афкор сурат гирифт. Ҷонибҳо вусъат бахшидани лоиҳаҳои сармоягузориро аз ҷониби бонки мазкур дар соҳаҳои мухталифи хоҷагии халқ, аз ҷумла сохтмони роҳҳои автомобилгард, таҷдиди парки троллейбусҳо, таъмини аҳолӣ бо оби нӯшокӣ дар минтақаҳои гуногуни ҷумҳурӣ зарур шумориданд.