БУНЁД ВА ТАҶДИДИ МАКТАБҲОИ БАДАХШОН

 Бадахшон, 18 октябр.(АМИТ «Ховар», Л. Додо).- Дар нишасти матбуотие, ки бо иштироки роҳбарони Раёсати маорифи ВМКБ баргузор гашт, зикр гардид, ки дар 9 моҳи соли ҷорӣ мактабҳои рақамҳои 15, 50-и ноҳияи Ванҷ, 8, 14, 15. ва 16-и ноҳияи Ишкошим, 6-и ноҳияи Рӯшон, рақамҳои 20, 25-и ноҳияи Шуғнон, мактабҳои рақами 7 ва 27-и ноҳияи Роштқалъа мавриди истифода қарор гирифта, дар ин мактабҳо 106 синфхонаи нав  бунёд гардид. Бо маблағи Вазорати маорифи ҷумҳурӣ барои мактабҳои рақами 10, 12 ва 18-и ноҳияи Роштқалъа ба маблағи 15071 сомонӣ мизу курсӣ харида шуд. Нахустин маротиба толибилмони ВМКБ дар олимпиадаҳои ҷаҳонӣ ширкат варзида, соҳиби 7 медал ва дипломҳои дараҷаҳои 1 ва 2 гардиданд. Ҳамчунин, хонандагони макотиби вилоят бори нахуст аз рӯи асосҳои илм дар олимпиадаи ҷаҳонии мактаббачагон ба воситаи шабакаи Интернет иштирок намуда, аз ҷумлаи 900 нафар 199 нафарашон ба даври дуюм роҳ ёфтанд.