ЛАМПАҲОИ ВАТАНӢ РАВШАНТАРАНД

Душанбе, 25 октябр. (АМИТ «Ховар», Назокат Қодирова).-Дар ҶДММ «Сомон»-и шаҳри Чкалови вилояти Суғд истеҳсоли лампаҳои нави каммасрафи 40 ватта ба роҳ монда шуд.Ин 5-умин навъи фурӯзонакҳои каммасраф аст, ки  истеҳсоли он дар корхонаҳои ватанӣ  амалӣ мегардад. Айни замон дар ин коргоҳ 40 нафар занону духтарон ва ҷавонписарони маҳаллӣ  ба кор   фаро гирифта шудаанд.Роҳбарони ҷамъият талаботи аҳолиро ба назар гирифта, ният доранд то охири соли ҷорӣ ду хати нави истеҳсоли фурӯзонакҳои каммасрафро ба роҳ моҳ монанд. Баробари ба фаъолият шурӯъ намудани  хати нав истеҳсоли лампаҳои каммасрафи 60 ва 100 ватта низ ба роҳ монда шуда, ба ин васила теъдоди кормандони коргоҳ ба 60 нафар  мерасад.Бояд зикр кард, ки рӯшноии лампаҳои истеҳсоли ватанӣ  нисбат ба фурӯзонакҳои хитоӣ зиёдтар буда, корхона кафолати истифодаи яксолаи онро медиҳад. Ёдрас мешавем ки корхонаҳои истеҳсоли фурӯзонакҳои каммасраф дар ҷумҳурӣ ду адад буда, дигари он дар шаҳри Исфара пурсамар фаъолият дорад ва иқтидори солонаи он аз ҶДММ «Сомон» зиёдтар аст.