М. РОСИЙД: «ИМКОНОТРО БА НАФЪИ ҲАР ДУ ДАВЛАТ БОЯД ИСТИФОДА БУРД»

       Душанбе, 12 октябр.(АМИТ «Ховар», Марзия Саидова).- Масъалаҳои тақвияти  ҳамкории байнипарлумонии Тоҷикистону Индонезия дар мулоқоти Раиси Маҷлиси намояндагони Маҷлиси Олии ҷумҳурӣ Шукурҷон Зуҳуров бо роҳбари ҳайати  парлумонии Индонезия Муҳаммад Росийд Ҳидоят баррасӣ шуд.         Шукурҷон Зуҳуров меҳмононро бо фаъолияти парлумони касбии Тоҷикистон шинос карда гуфт,  ки вакилони палатаи поёнии парлумони мамлакат дар тӯли фаъолияти худ бо таҳия ва қабули қонуну қарорҳои муҳим дар рушди соҳаҳои мухталифи ҷомеа нақши муассир гузоштанд. Мавсуф ташрифи ҳайати парлумонии Индонезияро ба Тоҷикистон фоли нек номида, онро дар тақвияти ҳамкориҳои  самарабахши ҳар ду кишвар қадами устувор арзёбӣ кард.       Муҳаммад Росийд Ҳидоят иброз дошт, ки байни Тоҷикистону Индонезия  имкониятҳои зиёди  робитаҳо дар бахшҳои гуногун вуҷуд доранд ва бояд  ин имкониятро ба нафъи миллату давлати ҳар ду кишвар самаранок истифода бурд.