МАЪЮБОНРО ЧӢ ИНТИЗОР АСТ?

      Душанбе, 14 октябр. (АМИТ «Ховар», Лаззат Диловарзод).- Бино ба гуфти вазири меҳнат ва ҳифзи иҷтимоии аҳолӣ Маҳмадамин Маҳмадаминов, дар буҷаи соли 2011 барои таъмини маъюбон бо нафақа, кӯмакпулӣ, доруворӣ ва табобат 97 млн. сомонӣ пешбинӣ шудааст.          Боис ба ёдоварист, ки барои таъмини нафақа ва дигар кӯмакпулиҳои маъюбон  дар буҷаи соли 2010  ҳамагӣ 84 млн. сомонӣ  маблағ ҷудо  шудааст.  Зиёд   шудани    13 млн. сомонӣ дар буҷаи соли 2011   нисбат ба соли 2010 боз як ғамхории навбатии Ҳукумати ҷумҳурӣ дар ҳаққи  ин тоифаи аз ҷиҳати иҷтимоӣ ниёзманди ҶТ  мебошад.          Айни замон дар Ҷумҳурии Тоҷикистон 152 ҳазор нафар маъюбон  ба қайди Вазорати меҳнат ва ҳифзи иҷтимоии аҳолӣ   гирифта шудаанд, ки 20 ҳазор нафари онҳоро кӯдакон ташкил медиҳанд.          -Дастгирӣ ёфтани лоиҳаи Қонун «Дар бораи ҳифзи иҷтимоии маъюбон» аз ҷониби вакилони  палатаи поёнии порлумон дар Маҷлиси намояндагони Маҷлиси Олӣ аз 1 –уми октябри соли ҷорӣ бозгӯ аз ғамхориҳои навбатии давлати Тоҷикистон дар ҳаққи маъюбон дониста мешавад,- афзуд М. Маҳмадаминов дар сӯҳбат бо мухбири АМИТ «Ховар».