ПИЁДА СОХТАНИ СИЁСАТИ ФАРҲАНГӢ

   Душанбе, 25 октябр. (АМИТ «Ховар», Лаззат Диловарзод).- Соли ҷорӣ чун соли маориф ва фарҳанги техникӣ барои Донишкадаи давлатии санъати Тоҷикистон соли махсус маҳсуб ёфта, фаъолияти таълимӣ,  илмӣ ва тарбиявӣ баҳри пиёда сохтани сиёсати фарҳангии Ҳукумати Тоҷикистон тадбирҳои мушаххасе  роҳандозӣ карда шудааст,-гуфт ректори Донишкада Аслиддин Низомов зимни баргузории нишасти матбуотӣ ба хабарнигорон.    Ба гуфти А. Низомов, таи 9 моҳи соли ҷорӣ баргузории конфронси илмӣ — амалӣ бахшида ба соли маориф ва фарҳанги техникӣ, гузаронидани «Рӯзҳои дарҳои кушод», ҷамъбасти сессияи тобистонаи соли 2009 – 2010, таҷлили озмунҳои «Ақлҳоро ақлҳо ёрӣ диҳанд», «Донишҷӯи беҳтарини сол», «Пианинонавози беҳтарин», «Синфхонаи беҳтарин», «Навои дил», «Сози хушу овозихуш» аз чорабиниҳои беҳтарини Донишкада дар 9 моҳи солҷорӣ маҳсуб мёбанд.    Дар соли ҷорӣ даҳҳо вохӯриҳо бо шахсиятҳои маъруфи ҷумҳурӣ доир карда шудааст, ки ҳамаи ин дар пешрафти таълиму тарбияи донишҷӯён бетаъсир нахоҳад монд.    Дар Донишкада сол то сол сафи донишҷӯёни боистеъдод рӯй ба афзоиш дорад. Соли ҷорӣ намояндаи истеъдодҳои ҷавон Шерзод Латипов дар яке аз Симпозиумҳои байналмилалии ҳайкалсозон дар шаҳри Маскав миёни намояндагони 10 давлат сазовори Дипломи Симпозиум гардидааст.