САФАРИ ҲУНАРИИ ТЕАТР БАЪДИ СӢ СОЛ

Душанбе 20 октябр (АМИТ «Ховар», Мавҷуда Анварӣ).- «Моҳи сентябр бори аввал баъди сӣ сол сафари ҳунарии Театри давлатии академии опера ва балети ба номи С. Айнӣ дар вилояти Суғд бомуваффақият баргузор гардид»-гуфт имрӯз зимни нишасти матбуотӣ Вазири фарҳанги Ҷумҳурии Тоҷикистон-Мирзошоҳрух Асрорӣ ба хабарнигорони ВАО. Ӯ, ҳамчунин, қайд намуд, ки тайи нӯҳ моҳи соли ҷорӣ фаъолияти театрҳои ҷумҳурӣ дар ин давра рӯ ба беҳбудӣ оварда, намоишномаҳои таҳиянамудаи онҳо  на танҳо дар дохили кишвар, балки берун аз он  низ соҳиби ҷоизаву мукофот гардиданд. Аз ҷумла, ҳайати эҷодии Театри давлатии ҷавонон ба номи М. Воҳидов бо спектакли «Рӯзи дарозтар аз қарн»-и Ч. Айтматов дар Ҷашнвораи байналмилалии Фаҷр дар Ҷумҳурии Исломии Эрон ба ҳайси меҳмон ва дар Фестивали байналмилалии «Гули сурх» дар шаҳри Мазори Шарифи Ҷумҳурии Исломии Афғонистон бахшида ба Иди байналмилалии Наврӯз иштирок намуд.   Ҳунармандони театри давлатии Ҷавонони Тоҷикистон ба номи М. Воҳидов бори аввал дар Фестивали байналмилалии «Золотой лев-2010» («Шери тиллоӣ») дар Украина ширкат варзида, бо сарбаландӣ ва диплому ҷоизаи  «Шери тиллоӣ» баргаштанд.