«ШЕРИ ТИЛЛОӢ»-И ТЕАТРИ ҶАВОНОН

Душанбе, 18 октябр. (АМИТ «Ховар», Дилшодаи Ҷонмард).-Ҳунармандони театри давлатии Ҷавонони Тоҷикистон ба номи М. Воҳидов бори аввал дар Фестивали байналмилалии «Золотой лев-2010» («Шери тиллоӣ») дар Украина ширкат варзида, бо сарбаландӣ ва диплому ҷоизаи  шери тиллоӣ баргаштанд. Ҳайати ҳунармандони театр, ки иборат аз 12 нафар буданд, намоишномаи «Чашмони бародари қиёматӣ»-и Нур Табаровро дар таҳияи Мирзоватан Миров пешкаши тамошобинони Украина гардониданд. Ҳамчунин, пас аз анҷоми фестивал аз номи Директори фестивали байналмилалии «Золотой лев» Ярослав Федарошин ба унвони Вазири фарҳанги Ҷумҳурии Тоҷикистон номаи миннатдорӣ расид, ки дар он, аз ҷумла омадааст: «Ба Шумо барои дастгириатон ба ҳайати ҳунармандони Театри давлатии ҷавонони ба номи М. Воҳидов, ки дар ин фестивал ширкат варзиданд, изҳори миннатдорӣ мекунам. Намоишномаи аз ҷониби ин гурӯҳ пешниҳодшуда аз тарафи тамошобинон хеле гарм истиқбол шуд. Аз ҷумла, сару либоси саҳнавӣ, нақшофарии касбии ҳунармандон, истеъдоди баланди коргардон дар сатҳи баланд ва барои тамошобинон фаромушношуданӣ буд». Ёдрас мешавем, ки Фестивали байналмилалии «Золотой лев-2010» («Шери тиллоӣ») аз 1-ум то 7-уми октябри соли равон дар шаҳри Ливови Украина 10-умин бор баргузор гардид, ки дар он театрҳои кишварҳои Молдова, Полша, Венгрия, Австрия, Русия, Шотландия, ИМА, Украина ва Тоҷикистон бо намоишномаҳои беҳтарини худ иштирок карданд. Бояд гуфт ки Фестивали "Золотой Лев" соли 1990 таъсис ёфта, он дар ду сол як маротиба чун фестивали театрҳои беҳтарин гузаронида мешавад. Имсол дар ин фестивал зиёда аз 30 намоишнома пешкаши тамошобинон гардид. Дар ин бора аз маркази матбуоти Вазорати фарҳанг хабар доданд.