ШИРКАТҲОИ СУҒУРТАВӢ КАМҲАВСАЛААНД Ё …

Душанбе, 15 октябр. (АМИТ «Ховар», Лаззат Диловарзод).-  Бино  ба маълумоти Агентии омори назди Президенти ҷумҳурӣ, дар моҳҳои январ – августи соли 2010  ширкатҳои суғуртавӣ ҳамагӣ 500 ҳазор шартнома имзо намуданд, ки ин нисбат ба ҳамин давраи соли 2009 4 фоиз кам аст. Аз шартномаҳои имзошуда 72,9 фоизаш   суғуртаи ихтиёрӣ буда  27,1 фоизаш суғуртаи ҳатмӣ мебошад.             То 1-уми октябри соли 2010 дар ҷумҳурӣ 16 ширкати суғуртавии иҷозатномадошта ба қайд гирифта шудааст, ки аз ин 2 –тояш ширкати давлатӣ буда, 14 –тояш ширкатҳои ғайридавлатӣ мебошанд.             Аз рӯи ҷамъбасти пешакии оморӣ,  маблағи барномавии ширкатҳои суғуртавӣ 24 млн. 788 ҳазору 800 сомониро ташкил мекунад, ки хеле ночиз аст. Он чиз боиси нигаронӣ аст, ки аз 5 млн. аҳолии қобили меҳнат   то имрӯз 1 млн. нафар ҳам суғуртаи ихтиёрӣ нашудаанд. Дар бораи суғуртаи амволи шахсӣ ҳоҷати гап ҳам нест. Ҳама ин гувоҳи он аст, ки ё мардум ба аҳамияти суғуртаи ихтиёрӣ сарфаҳм намераванд ё ширкатҳо дар кори тарғиби суғурта ниҳоят  камҳавсалаанд.