ТАЪСИСИ МАРКАЗИ РЕИНТЕГРАТСИЯ

             Душанбе, 22 октябр. (АМИТ «Ховар», Лаззат Диловарзод).- Яке аз самтҳои асосии фаъолияти Агентии давлатии ҳифзи иҷтимоӣ, шуғли аҳолӣ ва муҳоҷирати Вазорати  меҳнат ва ҳифзи иҷтимоии аҳолӣ оид ба татбиқи сиёсати давлатӣ дар соҳаи муҳоҷират ва муносибатҳои байналмилалии соҳавӣ ва ҷамъиятӣ ин таҳияи чорабиниҳо ва барқарор сохтани муносибатҳои дӯстона ва ҳамкориҳои мутақобилан судманд бо  дигар ташкилоти байналмилалӣ мебошад,- иброз дошт сардори шӯъбаи робитаҳои байналмилалӣ ва ҷамъиятии Агентии мазкур Абдуллоҳи Қодирӣ ба мухбири АМИТ «Ховар».             Бо мақсади татбиқи ҳамкориҳои байналмилалӣ дар соҳаи муҳоҷирати меҳнатӣ Агентии давлатии ҳифзи иҷтимоӣ, шуғли аҳолӣ ва муҳоҷират дар ҳамоҳангӣ бо Агентӣ оид ба ҳамкорӣ ва рушди техникӣ (ACTED) Меморандум оид ба ҳамкориро ба имзо расонид.             Бо назардошти фаъолияти якҷоя ҷиҳати таъсис додани Маркази реинтегратсия дар соҳаи Агентӣ дирӯз маросими ифтитоҳи ин Марказ доир гардид.             Мақсад аз таъсиси  маркази мазкур, дастгирии рушди иҷтимоӣ ва касбии реинтегратсионӣ, баҳодиҳии малакаи касбӣ, ба шуғл фарогирӣ, дастгирии рушди тиҷорат ва барномаҳое мебошанд, ки  дар мавриди бозгашти муҳоҷирони меҳнатӣ шароити мусоид фароҳам меоранд.