ТОҶИКИСТОН УЗВИ ГУРӮҲИ 77 ВА ХИТОЙ

Душанбе, 1 октябр. (АМИТ «Ховар», Фарангис Раҳимова). – 28 сентябри 2010 Ҷумҳурии Тоҷикистон ба узвияти Гурӯҳи 77 ва Хитой пайваст. Қарор дар ин бора дар Иҷлосияи солонаи Вазирони корҳои хориҷии Гурӯҳи 77 ва Хитой, ки дар Ню-Йорк дар чаҳорчӯби иҷлосияи 65-уми Маҷмаи Умумии Созмони Милали Муттаҳид баргузор шуд, қабул гардид. Намояндаи доимии Ҷумҳурии Тоҷикистон дар СММ Сироҷиддин Аслов дар иҷлосияи вазирони корҳои хориҷии Гурӯҳи 77 ва Хитой суханронӣ намуда, ба кишварҳои аъзои Гурӯҳ барои дастгирии номзадӣ ва қабули кишвари мо аз номи Ҳукумати Тоҷикистон изҳори минатдорӣ намуд. Гурӯҳи 77 ва Хитой калонтарин созмони байниҳукуматии кишварҳои тараққикунанда дар СММ мебошад. Гурӯҳи 77 ва Хитой ба кишварҳои Ҷануб воситаҳои изҳор ва ташвиқ намудани манфиатҳои дастҷамъонаи иқтисодии онҳоро фароҳам меорад, зарфияти муштараки музокиротии он кишварҳоро дар мавриди тамоми масъалаҳои асосии байналмилалии иқтисодӣ дар чаҳорчӯби системаи СММ тақвият мебахшад ва ба ҳамкории Ҷануб-Ҷануб ҷиҳати рушд мусоидат мекунад. Гурӯҳи 77 ва Хитой 15 июни 1964 аз ҷониби 77 кишвари тараққикунанда таъсис ёфта буд. Бо пайвастани Тоҷикистон ба Гурӯҳ миқдори давлатҳои аъзои он ба 131 кишвар расид. Дар ҳоли ҳозир Ҷумҳурии Яман раёсати Гурӯҳи 77 ва Хитойро дар СММ ба ӯҳда дорад. Дар ин бора аз департаменти иттилооти ВКХ ҶТ ба хабрнигори АМИТ "Ховар" хабар доданд.