ЗУҲУРОВ БА МИНТАҚАИ РАШТ МЕРАВАД

Душанбе, 12 октябр.(АМИТ «Ховар», Марзия Саидова).-13 октябр Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров бо сафари корӣ ба  минтақаи Рашт меравад. Дар ин хусус ба АМИТ «Ховар» сардори  маркази матбуоти палатаи поёнии парлумони мамлакат Муҳаммадато Султонов иттилоъ дод. Мавсуф афзуд, ки Шукурҷон Зуҳуров тӯли як ҳафта дар ноҳияҳои Рашт, Нуробод, Тоҷикобод бо мардум мулоқот карда, бо вазъи минтақа ошно мегардад. Мавриди зикр аст, ки Шукурҷон Зуҳуров зимни баромади худ дар иҷлосияи дуюми Маҷлиси намояндагони Маҷлиси Олии Ҷумҳурии Тоҷикистон 1 октябри соли 2010 нисбат ба авзои минтақаи  Рашт изҳороти расмӣ баён карда, аз ҷавонони ин минтақа даъват намуд, ки фирефтаи таблиғу макри   ҳар гуна гурӯҳҳои тундгаро ва ифротӣ нагарданд. Вай афзуда буд, ки вазъи пешомада ҳарчи зудтар роҳи ҳалли худро пайдо менамояд. Шукурҷон Зуҳуров намояндаи минтақаи Рашт дар палатаи поёнии парлумон-Маҷлиси намояндагон аст.