БУНЁДИ МАРКАЗИ ФАРҲАНГӢ ДАР САНКТ-ПЕТЕРБУРГ

  Маскав, 17 ноябр. (АМИТ «Ховар», Ҳалима Хушқадамова).- Ба пойтахти шимолии Русия- Санкт-Петербург ва дар маҷмӯъ ба вилояти Ленинград ҳамасола миқдори муайяни шаҳрвандони Тоҷикистон сафар менамоянд. 60 %-и муҳоҷирон барои кори муваққатӣ меоянд. Миёни мушкилоти намояндагони ҷамъият масъалаҳои гирифтани маълумоти мактабӣ, таъмини имконияти гузаронидани чорабиниҳои фарҳангӣ-мутобиқшавӣ барои кӯдакони муҳоҷирон аз ҷумлаи масъалаҳои асосӣ мебошад. Ин масъалаҳо 15 ноябр дар чаҳорчӯби мулоқоти губернатор Валерий Сердюков ва Консули ифтихории Тоҷикистон дар вилояти Ленинград Муҳаммадназар Мирзода муҳокима гардид. Консули ифтихорӣ зикр намуд, ки ташкили маркази фарҳангӣ барои мулоқоти меҳмонони тоҷикистонӣ бо собиқадорон ва намояндагони дигар ҷамъиятҳо мусоидат намуда, метавонад бисёр масъалаҳои характери фарҳангиву маърифатӣ доштаро ҳал намояд. В. Сердюков иброз намуд, ки яке аз масъалаҳои муҳими рӯз ин таъмини шароити мусоиди корӣ ва зиндагӣ дар қаламрави минтақа барои ҳамаи истиқоматкунандагон, аз ҷумла муҳоҷирони муваққатии дигар кишварҳо маҳсуб мегардад. «Назорати фазои бо кор таъмин кардани муҳоҷирон ногузир аст», — изҳор дошт губернатор. Дар ҷамъбасти мулоқот ба Консули ифтихории Тоҷикистон пешниҳод шуд, ки барои бунёди бинои маркази фарҳангӣ ҷой интихоб намуда, реҷаи кории онро муайян намояд. Ёдовар мешавем, ки дар нимсолаи аввали соли 2010 мубодила ва савдои хориҷии вилояти Ленингради Русия бо Тоҷикистон 3,4 млн. доллари ИМА-ро ташкил додааст.