ДАР ҲАР ДУ РӮЗ ЯК ҶИНОЯТ

Душанбе, 19 ноябр. (АМИТ «Ховар», ЛаззатДиловарзод).- Дар ҳукумати шаҳри Ваҳдат нисбат ба фаъолияти кормандони шӯъбаи корҳои дохилии ноҳия  баҳо дода,  ба мухбири АМИТ «Ховар» иброз намуданд, ки дар моҳҳои январ – октябри соли ҷорӣ дар ноҳия 198 ҷиноят ба қайд гирифта шудааст, ки дар  ҳар ду рӯз як ҷиноятро ташкил медиҳад. Аз ҷиноятҳои ба қайд гирифташуда 159 адади он кушода шудааст.    Тибқи маълумоти  манбаъ, агар сатҳи кушодашавии ҷиноятҳо дар самти кофтукови ҷиноӣ 83,5, ҷиноятҳои вазнин 89,8 ва авбошӣ 90 фоизро ташкил намояд, пас дар самти ҷиноятҳои махсусан вазнин – куштор,  расонидани ҷароҳати вазнин, таҷовуз ба номус, роҳзанӣ  ва тамаъҷӯӣ парвандаҳо 100 фоиз кушода шудаанд.    Дар ин муддат 20 адад яроқи оташфишон, аз ҷумла 8 адад автомати Калашников, 4 адад туфангча, 3 адад гранатомёт, 2 карабин, 2 ТОЗ, 12 норинҷак, 590 дона тирҳои ҳархела дарёфт ва мусодира гардидааст, ки он аз фаъолияти хуби кормандони милитсияи шаҳри Ваҳдат  дар 10 моҳи соли ҷорӣ дарак медиҳад.