«КАБКИ ҚАФАС»-РО БА ТУРКМАНИСТОН БУРДАНД

Душанбе, 10 ноябр. (АМИТ «Ховар», Дилшодаи Ҷонмард).-Имрӯз бо мақсади баргузор кардани Рӯзҳои фарҳанги Тоҷикистон дар Туркманистон, ҳайати расмӣ ва гурӯҳи эҷодии ҳунармандони тоҷик бо сарварии Вазири фарҳанги Ҷумҳурии Тоҷикистон Мирзошоҳрух Асрорӣ ба шаҳри Ашқобод сафар мекунанд. Ҳайати эҷодии Рӯзҳои фарҳангиро ҳунармандони Ансамбли давлатии хизматнишондодаи рақсии «Лола», ансамбли рақсии «Гулрез», Ҳунарпешагони халқии Тоҷикистон Саидқул Билолов, Рустам Дуллоев, Озодамоҳ Мӯҳтарамова, Аҳмадбек Ғаниев, Файзалӣ Ҳасанов, Ҳунармандони хизматнишондодаи Тоҷикистон Исроил Файзиддинов ва Бахтиёр Иброҳимов, овозхонони ҷавон — Нигина Амонқулова, Дилноза Каримова ва гурӯҳи доиранавозон ташкил медиҳад. Бояд гуфт Рӯзҳои фарҳанги Тоҷикистон дар Туркманистон аз 10 то 14-уми ноябр давом карда, дар чаҳорчӯби он як қатор чорабиниҳои фарҳангӣ дар назар аст. Аз ҷумла, аз ҷониби ҳунармандони Театри давлатии академии драмавии ба номи А. Лоҳутӣ намоиши спектакли «Кабки қафас»-и Темур Зулфиқоров, дар таҳияи Ҳунарпешаи халқии Тоҷикистон Баҳодур Миралибеков, намоиши аксҳои аккоси шинохта Шӯҳрат Ёров ва сангҳои қимматбаҳои Тоҷикистон пешкаши мардуми туркман  мешаванд.. Ёдовар мешавем, роҳбари бадеии барномаи консертии ҳайати Тоҷикистон Ҳунарпешаи халқии Тоҷикистон Набӣ Ҷалолов ва директори Рӯзхои фарҳанги Тоҷикистон дар Туркманистон Олимҷон Солиев мебошанд.  Дар ин бора аз маркази матбуоти Вазорати фарҳанг хабар доданд.