КАФОЛАТИ КОНСТИТУТСИЯ (САРҚОНУН)

Душабе, 5 ноябр. (АМИТ «Ховар», Лаззат Диловарзод).- Ҳуқуқ ба меҳнат, таҳсилот ва таъминоти иҷтимоӣ аз муҳимтарин ҳуқуқҳои инсонанд, ки Конститутсия (Сарқонун) онро кафолат додааст.    Бо дастгирӣ ва ташаббуси беназир ва созандаи Президенти мамлакат ҳифзи иҷтимоии аҳолӣ ва танзими муносибатҳои меҳнатӣ, аз ҷумла, дастгирии табақаҳои эҳтиёҷманди аҳолӣ аз самтҳои афзалиятноки сиёсати иҷтимоии давлат буда, нисфи зиёди захираҳои молиявию моддии давлат ба татбиқи ин соҳа равона мешавад.    Имрӯз дар ҷумҳурӣ қариб 553 ҳазор нафар нафақахӯрон, аз ҷумла 152 ҳазор маъюбон, ки 19 ҳазори онро кӯдакон ташкил медиҳанд, ба қайд гирифта шудаанд.    Агар ҳаҷми маблағгузории муассисаҳои статсионарӣ дар соли 2009 бо назардошти маблағгузории иловагӣ 12 млн. 173 ҳазору 511 сомониро ташкил диҳад, пас дар соли 2010 ин маблағгузорӣ ба 14 млн. 397 ҳазору 757 сомонӣ расидааст,- иброз дошт мудири шӯъбаи хизматрасонии иҷтимоӣ, оила ва кӯдак   Соима Муҳаббатова ба мухбири АМИТ «Ховар».