НИШАСТИ ДУШАНБЕ ВА НАҚШИ ОН ДАР СУБОТИ МИНТАҚА

           Душанбе, 23 ноябр.(АМИТ «Ховар», Марзия Саидова). –Масъалаи тақвияти муносиботи гуногунҷабҳаи Ҷумҳурии Тоҷикистон бо Созмони Ҳамкории Шанхай  /СҲШ/ 23 ноябр дар мулоқоти Раиси Маҷлиси намояндагони Маҷлиси Олии Ҷумҳурии Тоҷикистон Шукурҷон Зуҳуров бо Дабири кулли СҲШ Муратбек Иманалиев баррасӣ гардид.            Шукурҷон Зуҳуров дар радифи баррасии масоили мавриди назари тарафайн, ба масъалаи омодагӣ ба баргузории нишасти сарони ҳукуматҳои кишварҳои аъзои СҲШ, ки 25 ноябр дар шаҳри Душанбе баргузор мегардад, таваҷҷӯҳи махсус зоҳир намуд.          Мавсуф баргузор шудани ҳамоиши сарони ҳукуматҳои кишварҳои аъзои СҲШ –ро дар Душанбе аз тавсеаи ҳамкориҳои  гуногунсоҳаи кишварҳои  аъзо  арзёбӣ кард.          Шукурҷон Зуҳуров ибрози умед намуд, ки ин нишаст барои рафъи мушкилоти мавҷуда миёни баъзе аз давлатҳои СҲШ мусоидат намуда, дӯстиву рафоқат ва ҳамдигарфаҳмии комилро густариш хоҳад дод.         Дабири кулли СҲШ Муратбек Иманалиев нақши  Ҷумҳурии Тоҷикистонро дар тақвияти нуфузи ин созмон дар арсаи ҷаҳонӣ  назаррас арзёбӣ карда гуфт,  ки Тоҷикистон ҳамчун узви фаъоли ин созмон дар ҳалли мушкилоти СҲШ нақши арзанда дорад.       Мусоҳибон изҳори умедворӣ карданд, ки баргузории нишасти сарони ҳукуматҳои СҲШ дар Душанбе ҷиҳати таҳкими амнияту субот дар минтақа ва муносиботи гуногунсоҳаи кишварҳои созмон мусоидат хоҳад кард.