САҲМИ ЭРОН ДАР ТАРҲҲОИ ЭНЕРГЕТИКИИ ТОҶИКИСТОН

Душанбе, 9 ноябр. (АМИТ «Ховар», Пайрав Назаров).- Масъалаҳои равобити дуҷониба, ҳамкориҳои иқтисодиву фарҳангӣ дар мулоқоти  Вазири корҳои хориҷии Ҷумҳурии Тоҷикистон Ҳамрохон Зарифӣ бо Вазири корҳои хориҷии Ҷумҳурии Исломии Эрон Манучеҳри Муттакӣ 7 ноябри соли 2010  мавриди муҳокима қарор гирифтанд. Мулоқот чанд рӯз қабл дар шаҳри Теҳрон дар доираи ҷаласаи 9-уми вазирони корҳои хориҷии Муколамаи осиёии ҳамкориҳо (ACD) баргузор гардид. Тавре ба хабарнигори АМИТ «Ховар» аз Департаменти Вазорати корҳои хориҷии Ҷумҳурии Тоҷикистон хабар доданд, дар чаҳорчӯби мулоқот масъалаи саҳми Ҷумҳурии Исломии Эрон дар тарҳҳои энергетикӣ ва нақлиётии Тоҷикистон ва минтақаи Осиёи Марказӣ мавриди муҳокима қарор гирифт. Мавзӯи таҳсили донишҷӯёни тоҷик дар муассисаҳои таълимии Ҷумҳурии Исломии Эрон, низом ва шароити таҳсили онҳо, дурнамои ҳамкориҳои дуҷониба дар ин самт мавриди таваҷҷӯҳи тарафайн қарор гирифт. Вазир аз ҷониби эронӣ изҳори хоҳиш намуд, ки дар баргардонидани донишҷӯёни тоҷик, ки аз роҳҳои ғайриқонунӣ барои таҳсил ба ин кишвар омадаанд, мусоидат намояд.  Ҷонибҳо, инчунин, масъалаҳои амният дар минтақа, вазъияти сиёсӣ-иҷтимоӣ дар Афғонистон ва дигар мавзӯъҳои мавриди таваҷҷӯҳи муштаракро баррасӣ намуданд.