ҚОНУНИ НАВ ГАРАВИ САЛОМАТИИ ҶОМЕА

       Душанбе, 16 декабр.(АМИТ «Ховар», Марзия Саидова).-Палатаи болоии парлумони Тоҷикистон  Қонуни Ҷумҳурии Тоҷикистон «Дар бораи маҳдуд намудани истифодаи  маҳсулоти тамоку»-ро 16 декабр дар иҷлосияи сеюми  Маҷлиси миллӣ ҷонибдорӣ намуд.     Убайдулло Қурбонов раиси кумитаи Маҷлиси миллӣ  зимни тавзеҳи  масъалаи мазкур гуфт, ки тибқи талаботи меъёрҳои қонуни мазкур минбаъд кашидани тамоку дар дохили биноҳои маъмурӣ, ҳуҷраҳои кории ташкилоти давлатӣ ва ғайридавлатӣ, муассисаҳои таълимӣ, тандурустӣ, фарҳангӣ, варзишӣ, динӣ, истироҳатгоҳҳо, фурудгоҳҳо, саристгоҳҳои роҳи оҳан манъ  аст.      Ҳамзамон, Убайдулло Қурбонов афзуд, ки қонуни мазкур асосҳои ҳуқуқии маҳдуд намудани истифодаи маҳсулоти тамокуро бо мақсади пешгирӣ ва коҳиш додани сатҳи бемориҳои гуногун, ки аҳолӣ бо истифода аз тамоку мубтало мегардад, муайян менамояд. Инчунин, қонун фурӯши сигарета, сигор, папирос ва дигар маҳсулоти тамокуро  дар ҳудуд ва назди муассисаҳои таълимӣ, тандурустӣ, фарҳангӣ ва варзишӣ манъ мекунад. Мавсуф афзуд, ки қонуни нав гарави саломатӣ дар ҷомеа аст. Барои истифодаи маҳсулоти тамоку ҷойҳои махсус ташкил мешавад.