ҶАЛАСАИ ИТТИҲОДИ АВРУПО ВА ТОҶИКИСТОН

Душанбе, 13 декабр. (АМИТ «Ховар», Мавҷуда Анварӣ).-Масъалаҳои ҳамкории минтақавӣ ва байналмилалӣ, ҷабҳаҳои калидии татбиқи амалии стратегияи Иттиҳоди Аврупо барои кишварҳои Осиёи Марказӣ, масъалаҳои сиёсӣ, аз ҷумла ислоҳоти дохилӣ ва масоили марбут ба ҳуқуқи инсон, обу энергетика ва муҳити зист мавзӯъи асосии аввалин ҷаласаи Шӯрои ҳамкорӣ миёни Иттиҳоди Аврупо ва Ҷумҳурии Тоҷикистон, ки  имрӯз 13 декабр дар шаҳри Брюссел баргузор гардид,   қарор гирифт .             Ҳайати расмии Ҷумҳурии Тоҷикистонро дар машварати мазкур Ҳамрохон Зарифӣ-Вазири корҳои хориҷии кишвар роҳбарӣ менамояд. Ҳамзамон, ба ҳайати расмии Ҷумҳурии Тоҷикистон П. Муҳиддинов — муовини аввали вазири энергетика ва саноат, С.Раҳимов – муовини аввали вазири мелиоратсия ва захираҳои обӣ ва Ш. Нодирова – муовини вазири адлияи Ҷумҳурии Тоҷикистон шомиланд. Ҷониби Иттиҳоди Аврупоро дар ҷаласаи мазкур ҷаноби Янош Мартони, Вазири корҳои хориҷии Маҷористон, раиси Шӯрои ҳамкорӣ ва роҳбари ҳайати Иттиҳоди Аврупо муаррифӣ менамояд.