БАРНОМАИ РУШДИ САЛОМАТӢ

   Хоруғ,  14 декабр. (АМИТ «Ховар», Л.Додо). – Барномаи  «Рушди  саломатии  ҷавонон  дар  Ҷумҳурии  Тоҷикистон  барои солҳои 2011 – 2013» мавзӯи  асосии  семинаре буд, ки  дар Кохи  ҷавонони ВМКБ  баргузор  гардид.            Дар  семинар   роҳбарони  раёсати  ҳифзи  иҷтимоии  аҳолӣ,  шӯъбаҳои  маориф, раёсати  тандурустии  ҷавонон,  варзиш ва  сайёҳии  шаҳру навоҳии  вилоят  ширкат  варзиданд.           Раиси  Кумитаи  кор  бо  занони  вилоят Меҳрӣ Ғуломшоева  зимни суханронии хеш  гуфт, ки  барнома     аз  ҷониби  роҳбарияти  вилоят ҷонибдорӣ  гардида,  дар  он  на танҳо  вазъи  саломатии  ҷавонон,  балки  рушди  фарҳангу  маънавиёт низ  мавриди  баррасӣ  қарор  дорад.           Масъули  барномаи «Рушди  саломатии  ҷавонон» дар  ҷумҳурӣ барои солҳои 2011 – 2013» ва  мудири  шӯъбаи  сиёсати  иҷтимоии  Кумитаи  варзиш  ва  сайёҳии  назди  Ҳукумати  Ҷумҳурӣ Иброҳим  Мирзоев оид ба  масоили зиёдшавии    бекорнамоии  ақди  никоҳ,  даст ба  қочоқ задани  ҷавонон,  одамфурӯшӣ, касалиҳои  сироятӣ, аз  қабили  ВИЧ/СПИД ва  бо  ҷойи  кор  таъмин   намудани  ҷавонон ҳарф  зада, зикр  кард, ки  барномаи  мазкур   бояд  дар  тамоми гӯшаву  канори  вилоят,  бахусус  деҳот  амалӣ   гардад.            Ҳадафи  асосии   барнома  беҳбуди  вазъи  саломатии  наврасон ва  ҷавонон  тавассути  кам  кардани  рафторҳои  хавфнок  ва  одатҳои  номатлуб мебошад. Мувофиқи  маълумоти  оморӣ Тоҷикистон аз  нигоҳи  аҳолӣ дар  миқёси  ҷаҳон яке  аз  кишварҳои  ҷавонтарин  маҳсуб  меёбад, зеро  70  фоизи  аҳолиро   насли  ҷавон, яъне   шахсони  то  30  сола  ташкил  медиҳанд.               Вобаста ба  таносуби  ҷинсӣ 49,8  фоизи аҳолӣ  ҷавондухтаронанд, ки ба  рушди  имконоти демографӣ муносибати мустақим   доранд.             Мутаносибан 70,4  дар  сади   ҷавонон деҳотиёнанд. Аз ин  лиҳоз баррасӣ ва ҳалли  проблемаҳои  саломатӣ  бояд  маҳз  дар байни ҳамин  гурӯҳ  фаро гирифта шавад, зеро  дастрасии онҳо  ба  хизматрасониҳои   зарурӣ  маҳдудтар аст.