«БОЯД ИҚДОМИ ҶИДДИРО РӮИ ДАСТ ГИРЕМ» : Ш. ЗУҲУРОВ

Душанбе, 16 декабр.(АМИТ «Ховар», Марзия Саидова).-«Мутаассифона,  сатҳ ва раванди иҷрои cанадҳои имзошудаи байнидавлативу байниҳукуматии Тоҷикистону Индонезия моро қаноатманд карда наметавонад ва  мо бояд барои иҷрои ҳамаҷонибаи онҳо иқдоми ҷиддитареро рӯи даст гирем». Ин матлабро Раиси Маҷлиси намояндагон дар мулоқоташ бо Раиси Конгресси Индонезия Тауфик Киемас иброз кард. Ш. Зуҳуров афзуд, ки роҳбарияти давлату ҳукумати Тоҷикистон талош доранд, ки бо амалӣ намудани барномаҳои дарозмуддату кӯтоҳмуддат ва ҷалби сармояҳои хориҷӣ дар самти паст кардани сатҳи камбизоатӣ, баланд бардоштани вазъи некӯаҳволии мардум, таъсиси ҷойҳои корӣ, таъмини аҳолӣ бо нерӯи барқ, рушди соҳаҳои маорифу тандурустӣ, ҳифзи арзишҳои миллӣ иқдоми ҷиддӣ намояд.    Котиби матбуотии Маҷлиси намояндагон Муҳаммадато Султонов аз Ҷакарта  ба АМИТ «Ховар» иттилоъ дод, ки мусоҳибон дар ҷараёни мулоқот самтҳои афзалиятноки ҳамкориҳои гуногунсоҳаи байни Тоҷикистону Индонезияро дар бахши иқтисоду тиҷорат, сармоягузорӣ, энергетика, туризм баррасӣ карда, хостори густариши робитаҳо дар ин соҳаҳо гардиданд.    Мусоҳибон ҳамчунин доир ба авзои Афғонистон, вазъи минтақа  ва ҷаҳон, масъалаҳои мубориза бар зидди терроризм, қочоқи маводи мухаддир, ифротгароӣи ва дигар ҷиноятҳои фаромиллӣ табодули назар карданд. Зикр шуд, ки Тоҷикистон ва Индонезия доир ба ин масъалаҳо мавқеи муштарак доранд.