ФАРМОНДЕҲИ НАВИ ДИВИЗИЯИ ҲАРБИИ 201
Душанбе, 6 декабр. (АМИТ «Ховар», Марҳабо Зунунова). –Фармондеҳи нави дивизияи ҳарбии 201-и Русия мустақар дар Тоҷикистон полковник Сергей Рюмшин таъин гардид. Фармони мазкур 27 ноябри соли ҷорӣ аз ҷониби Президенти Федератсияи Русия Дмитрий Медведов ба имзо расид. Дар ин бора ба хабарнигори АМИТ «Ховар» ёрдамчии фармондеҳи дивизияи ҳарбии 201-и Русия оид ба таъмини иттилоот капитан Дмитрий Матушкин иттилоъ дод. Тибқи суханони Д. Матушкин С. Рюмшин дар ин вазифа Игор Красинро, ки аз соли 2009 инҷониб дар ин мапнсаб қарор дошт, иваз намуд. «Муддати чанд моҳ буд, ки Сергей Рюмшин вазифаи иҷрокунандаи фармондеҳи дивизияро бар дӯш дошт», — иброз намуд ӯ. Ёдовар мешавем, ки дивизияи ҳарбии Русия дар Тоҷикистон барои барқарор ва мустаҳкам намудани сулҳ дар минтақаҳои Осиёи Марказӣ, дастгирии сарҳадбонони тоҷик дар марзи Тоҷикистон Афғонистон, ҳамчунин, барои кӯмак расонидан ба қувваҳои мусаллаҳи ҷумҳурӣ мустақар шудааст. 16 октябри соли 2004 Созишномаи мубодилаи тасдиқи ҳуҷҷати Шартнома дар бораи мақом ва шароити буду боши дивизияи ҳарбии Русия дар қаламрави Тоҷикистон ба имзо расид. Ҳамин тариқ дивизияи 201-и ҳарбии Русия дар Тоҷикистон ба базаи ҳарбии Русия табдил дода шуд, ки он аз унсурҳои муҳим дар раванди умумии таъмини амнияти минтақаҳои Осиёи Марказӣ ба ҳисоб меравад. Базаи мазкур, ки дар ҳайати худ гурӯҳи ҳавонавардӣ ва се қисми ҳарбӣ дар Душанбе, Қурғонтеппа ва Кӯлоб дорад, қисми ҳарбии калонтарини Русия берун аз қаламрави он ба ҳисоб меравад.








Ҳамкории Тоҷикистон ва Созмони ҳамкории иқтисодӣ баррасӣ гардид
Дар Кумитаи хоҷагии манзилию коммуналӣ бахшида ба Рӯзи Президент чорабинии тантанавӣ баргузор гардид
Имрӯз дар Тоҷикистон ҳавои тағйирёбандаи бебориш пешгӯӣ мешавад
Дар шаҳри Панҷакент маркази хизматрасонӣ ва тарабхона ба истифода дода шуд
Дар Кӯлоб барои омодагӣ ба ҳолатҳои фавқулода ҷаласа доир шуд
Бахшида ба Рӯзи Президент дар шаҳри Бӯстон Рӯзи дарҳои кушод доир гардид
ПАНҶАКЕНТИ ҚАДИМ. Оид ба омӯзиши он конференсияи илмӣ баргузор шуд
Дар шаҳри Панҷакент фаъолияти корхонаҳои саноатӣ тақвият меёбад
Дар Тоҷикистон масоҳати хонаҳои истиқоматӣ бештар гардидааст
Дар шаҳри Кӯлоб бахшида ба Рӯзи Президенти Тоҷикистон ҳамоиш доир шуд






