ХАТҲОИ НАВИ ПАРВОЗ ЗАРУРАНД

   Душанбе, 20 декабр. (АМИТ «Ховар», Лаззат Диловарзод).- Тоҷикистон дар муддати 19 соли истиқлолият дар қиёс бо даврони шӯравӣ аз бисёр ҷиҳат пеш рафт ва ин ба касе пӯшида нест, акнун касе рӯмоли ҷопонию қолинҳои зебои камёбро на дар Санкт- Петербург меҷӯяду на дар дигар бозорҳои Русия.  Имрӯз дар бозорҳои шаҳри Душанбе ба иборае «шири мурғ» -ро пайдо кардан мумкин, — мегӯяд қаҳрамони кори шӯравӣ Ҳасан Гадоев. Аммо  чизе, ки аз он  чашм пӯшида намешавад аз байн рафтани хатсайрҳои ҳавоии дохили кишвар аст, ки чандин сол боз фаъол нестанд. Ҳамагон хостори онанд,  ки роҳи наздику бехатар дошта бошанд ва ин роҳ — роҳи хатсайрҳои ҳавоӣ аст, ки барқарор намудани онҳо тақозои замон  ва амри зарурӣ аст.    Ширкатҳои ҳавопаймоии кишвар  бо мақсади ба даст овардани фоидаи бештар дар кушодани хатҳои нави парвоз бо давлатҳои Аврупою Осиё бештар таваҷҷӯҳ доранд, ки ин бадӣ надорад, аммо хатҳои парвози дохилӣ, ки минтақаҳои гуногуни кишварро ба якдигар мепайванданд, набояд фаромӯш шаванд.    Шояд ширкатҳои ҳавопаймоии «Тоҷик  Эйр » ва «Сомон  Эйр» дар соли нави милодӣ бо назардошти дархости мардум фикри кушодани хатсайрҳоро дар дохили кишвар аз сар гиранд.