«КОРВОНИ МАЪНАВИЯТ» ДАР ШАҲРИ ҚАЙРОҚҚУМ

Душанбе, 15 декабр. (АМИТ «Ховар», Бекназари Абӯбакр). — Маҳфили «Корвони маънавият» бо ташаббуси Хонаи методии шӯъбаи маорифи шаҳри Қайроққум дар ду моҳ як маротиба, бо навбат дар яке аз мактабҳои шаҳракҳо баргузор мегардад. Корвони навбатӣ ба мактаби таҳсилоти ҳамагонаи № 3-и шаҳраки Консой сафар намуд. Сармавзӯи корвон «Ватанам Тоҷикистон» аст ва дар кори он роҳбарон ва омӯзгорон иштирок менамоянд.  Корвон ба маҳфилҳо – «Эҳсон» (муаллимони синфҳои ибтидоӣ), «Ирфон» (муаллимони забони давлатӣ), «Шодон» (муаллимони таълими мусиқӣ ва санъат), «Сорбон» (роҳбарони иттиҳодияҳои методии шӯъбаи маориф), «Мизбон» (қабулкунандагони Корвон)  тақсим мешавад ва мувофиқи самти худ фаъолият мебарад. Мавриди зикр аст, ки корвони маънавият маҳсули эҷоди маорифчиёни шӯъбаи маорифи шаҳри Қайроққум аст.