КУМИТАИ АМОНАТГУЗОРОН САНҶИШ ГУЗАРОНД

   Душанбе, 10 декабр. (АМИТ «Ховар», Лаззат Диловарзод).- Вобаста ба ҳодисаҳои ахири ба  фаъолияти ширкати «Мовароуннаҳр» алоқаманд, худи муштариёни ширкати мазкур нороҳатанд. Онҳо аз он изҳори норозигӣ доранд, ки дар сурати кашол додани кор оид ба фаъолияти минбаъдаи ширкат талаю тороҷ шудани молу анволи он аз эҳтимол дур нест.    Тибқи санҷиши кумитаи амонатгузорони ширкат, маблағи барои сохтмони манзили истиқоматӣ масрафгардидаи  ширкати «Мовароуннаҳр» 20 млн доллари амрикоиро ташкил додаст. Дар сурати пурра қатъ шудани кор  дар биноҳои сохтмонашон ба анҷом наздики  шаҳракҳои 46 ва Гипрозем барои 130 оила,   иморатҳои сохтмонашон 80 — 90 фоиз анҷомёфта дар  шаҳракҳои 82 ва Гипрозем барои 180 оила ва ҳамчунин иморатҳои сохтмонашон 50 фоиз анҷомёфта, барои 300 оила дар шаҳраки Гипрозем тақдири минбаъдаи ин биноҳо чӣ мешавад?    Базаи техникии  ширкат аз 60 мошин ва 25 крани борбардор иборат аст, ки маблағи он 4,5 млн. доллари амрикоиро ташкил медиҳад. Боигарии ширкат 99 млн. сомонӣ ва ӯҳдадориаш  дар назди муштариён 30 млн. сомонӣ аст.    Ба ақидаи кормандони кумитаи амонатгузорон, дар сурати пардохти ҳамаи қарзҳо,  дар суратҳисоби ширкат 68 млн. сомонӣ боқӣ мемонад, ки он далели   муфлис нашудани ширкат мебошад.    Боис ба ёдоварист, ки чанде пеш роҳбари ширкати «Мовароуннаҳр» бо ҷурми қаллобӣ дастгир шуда,  мавриди бозпурсӣ қарор дорад.