МУЛОҚОТИ РАИСИ ШАҲРИ ХУҶАНД БО БО ДОНИШҶӮЁН

   Душанбе, 21 декабр. (АМИТ «Ховар», Бекназари Абӯбакр). — Имрӯз дар толори маҷлисгоҳои  Донишгоҳи омӯзгории Тоҷикистон ба номи Садриддин Айнии шаҳри Душанбе раиси шаҳри Хуҷанд Содиқҷон Мирхолиқов бо донишҷӯёни хуҷандӣ, ки дар макотиби олии пойтахт таҳсил мекунанд, мулоқот анҷом дод. Аз маркази таҳлил ва иттилооти мақомоти иҷроияи ҳокимияти давлатии шаҳри Хуҷанд ба АМИТ «Ховар» иттилоъ доданд, ки С. Мирхолиқов роҷеъ ба бурду бохти иқтисодию иҷтимоии шаҳри Хуҷанд, заҳмати аҳлонаи хуҷандиён баҳри истиқболи сазовори ҷашни 20-солагии Истиқлолияти давлатии Ҷумҳурии Тоҷикистон, вусъати корҳои ободонӣ ва созандагию бунёдкорӣ, нақши ҷавонон дар рушди ҳамаи паҳлӯҳои ҳаёти ҷамъиятӣ ва вазифаҳое, ки аз суханронии Президенти Ҷумхурии Тоҷикистон дар мулоқот бо варзишгарони  мамлакат бармеояд, сухан ронд. Иштирокдорони мулоқот ба раиси шаҳр аз боби имкониятҳои рушди минбаъдаи соҳаҳои хоҷагии халқ, ҳалли масъалаҳои иҷтимоӣ, татбиқи технологияҳои иттилоотии коммуникатсионӣ дар фаъолияти шаҳрдорӣ пурсон шуданд ва ба саволҳои худ ҷавобҳои мушаххас гирифтанд. Раиси шаҳр аз ҷавонони хуҷандӣ — муҳассилини донишкадаю донишгоҳҳо даъват ба амал овард, ки хуб хонанд, асосҳои илму донишро азхуд намоянд ва минбаъд ҳамчун мутахассисони соҳибмаълумот саҳмгузори равнақу шукуфоии Тоҷикистони соҳибистиқлол гарданд. Дар фарҷом ба 70 нафар донишҷӯёни пешқадам идрорпулии яквақтаи раиси шаҳри Хуҷанд супорида шуд.