НАХУСТСЕМИНАРИ МИЛЛӢ ОИД БА ПЕШГИРИИ МАВОДИ МУХАДДИР

Душанбе, 8 декабр. (АМИТ «Ховар», Лутфия Эшонқулова).- 7 декабр дар Агентии назорати маводи мухаддири назди Президенти ҶТ дар доираи Барномаи Иттиҳоди Аврупо оид ба пешгирии паҳншавии маводи мухаддир (CADAP-5), ҳамчунин, бо мақсади муттаҳидии вазорату идораҳои ҳавасманди Ҷумҳурии Тоҷикистон аввалин семинари миллӣ дар мавзӯи «Ҳисоботи стандартии рушди дарозмуддати соҳаи иттилоот оид ба маводи мухаддир  дар Тоҷикистон» ба кори худ шурӯъ намуд.    Тавре ба АМИТ «Ховар» аз маркази матбуоти Агентӣ иттилоъ доданд, семинари мазкур барои кормандони Агентии назорати маводи мухаддири назди Президенти ҶТ, Маркази миллии мониторинг ва пешгирии истеъмоли маводи нашъадор, Маркази наркологии ҷумҳуриявӣ ва дигар идораҳои зертобеи Вазорати тандурустии ҶТ, ҳамчунин, ВКД, Хадамоти адлия ва гумруки ҶТ ташкил шудааст. Мақсади асосии баргузории семинар ҷамъоварии иттилоот, ташкили ҳисоботи ҳарсола оид ба масъалаи ҳолати нашъамандӣ дар ҷумҳурӣ ва минтақа мувофиқ бо стандарти байналмилалӣ, аз ҷумла, пайдо намудани ҳамкории стратегӣ дар ин самт мебошад. Пагоҳ семинар кори худро идома медиҳад.