РӮЗИ ҶАҲОНИИ ФАЛСАФА

          Душанбе, 3 декабр.(АМИТ «Ховар», Марзия Саидова).-Бахшида ба Рӯзи ҷаҳонии фалсафа, ки ҳамасола 3 декабр таҷлил мегардад, дар Пажӯҳишгоҳи фалсафаи Академияи илмҳои ҷумҳурӣ конфронси ҷумҳуриявии илмӣ дар мавзӯи «Масъалаҳои муосири  илми фалсафа»  баргузор шуд, ки дар он  олимону донишмандон ва файласуфони кишвар ҳузур доштанд.          Дар конфронс доктори илмҳои фалсафа Кароматулло Олимов, директори Пажӯҳишгоҳи фалсафаи Академияи илмҳои ҷумҳурӣ Абдувоҳид Шамолов ва дигар олимону донишмандон доир ба масъалаҳои мубрами  илми таърихи фалсафа  дар даврони муосир, илми фалсафаи имрӯза дар Тоҷикистон,  мақоми риторика ва дигар паҳлӯҳои илми фалсафа ибрози назар карданд.          Ба андешаи директори Пажӯҳишгоҳи фалсафаи Академияи илмҳои кишвар Абдувоҳид Шамолов,  ҷиҳати баланд бардоштани афкори фалсафии ҷомеа Пажӯҳишгоҳи фалсафаи Академияи илмҳои ҷумҳурӣ ба номи Баҳоуддинов корҳои шоёнро ба анҷом мерасонад. Аз ҷониби олимону кормандони Пажӯҳишгоҳ доир ба таълимоти фалсафа адабиёту китобҳо барои хонандагони мактабҳои олӣ  ва ҷомеаи Тоҷикистон омодаи чоп шудаанд. Ҷилди якуми таърихи фалсафаи тоҷик омодаи чоп гардидааст.              Конфронс дар бахшҳои анъанаҳои ақлгароӣ дар таърихи фалсафаи Шарқ ва Ғарб, омилҳои иҷтимоӣ, иқтисодӣ, сиёсӣ ва таъсири онҳо ба афкори  фалсафаи муосир ҷараён гирифта, иштирокдорони конфронс  роҷеъ ба мавзӯъҳои зикргашта табодули назар карданд.            Мавриди зикр аст, ки аз соли 2002 бад-  ин сӯ бо Қарори ЮНЕСКО ҳар сол 3 декабр дар саросари дунё ҳамчун Рӯзи фалсафа таҷлил мегардад. Конфронси мазкур бо ибтикори  Академияи илмҳои ҷумҳурӣ ва Фонди байналмилалии ба номи Фридрих Эбберт /Олмон/ созмон дода шуд.