РОҲИ НАВИ ҲАВОӢ

        Душанбе, 3 декабр. (АМИТ «Ховар»,  Мавзуна  Бойева). – Ширкати  ҳавонавардии «Эйр Остона» дар  байни  пойтахти  Тоҷикистон —  шаҳри  Душанбе ва шаҳри  Алмаато  роҳи нави  ҳавоӣ  кушод. Ҳавопаймои  нахустин  аз  Алмаато ба  Душанбе  21  ноябри  соли равон  парвоз  кард. Акнун  ҳавопаймоҳои  мусофирбар  дар  байни Душанбе  ва  Алмаато  ҳар  ҳафта  се  маротиба — рӯзҳои  чоршанбе, ҷумъа ва  якшанбе  парвоз  мекунанд.           Намояндаи  ширкати «Эйр Остона» дар  шаҳри  Душанбе  Нозим  Иминов ба  мухбири  АМИТ «Ховар»  гуфт, ки  мусофирон   ба  воситаи  ҳавопаймоҳои  «Фоккер – 50» кашонида  мешаванд. Чунин  ҳавопаймо  барои  50  мусофир  ҷойи  нишаст  дорад. Ба туфайли  кушодани  роҳи нави  ҳавоӣ ҳамкории  иқтисодии  Тоҷикистону  Қазоқистон  бештар  густариш  меёбад. Ба  шарофати он  инчунин  соҳаи  туризми  ҳар  ду  кишвар  тараққӣ  хоҳад  кард.  Мусофирони тоҷик  метавонанд, аз фурудгоҳи  Алмаато ба  шаҳрҳои  дигари  ҷаҳон,  аз  ҷумла  Маскав,  Урумчӣ, Пекин, Сеул, Абӯ — Забӣ ва  ғайра  парвоз  кунанд.             Нархи чиптаи  ҳавопаймои  мазкур  аз Душанбе  то  Алмаато 675 сомонӣ ва  нархи  чиптаи  рафту омади он 1251  сомонӣ  мебошад.