СТИПЕНДИЯИ МЕНДЕЛЕЕВ БА ДОНИШҶӮЁНИ ЭҶОДКОР

Душанбе, 30 декабр. (АМИТ «Ховар», Бекназари Абӯбакр). — 5 нафар донишҷӯён аз вилояти Суғд  ба гирифтани стипендияи  Фонди «Донишкадаи  тадқиқотии Авруосиёӣ»-и Федератсияи Россия-  стипендияи ба номи Д.И.Менделеев мушарраф гардиданд. Дар ин бора ба АМИТ «Ховар» аз хадамоти матбуоти раиси вилояти Суғд иттилоъ доданд. Мавриди зикр аст, ки аз соли 2006 то имрӯз беш аз 100 нафар донишҷӯёни макотиби олии Тоҷикистон  стипендияи ба номи Д.И. Менделеевро  соҳиб шуданд, ки 14 нафари онҳо аз вилояти Суғд мебошанд. Стипендияи мазкур  дар ҳаҷми 50 доллари ИМА  буда, ҳар моҳ ( давоми   семестр) аз рӯи қурби бонки Миллии  Ҷумҳурии Тоҷикистон бо пули сомонӣ аз ҳисоби маблағи фонди махсуси ҳукуматӣ пардохта  мешавад. Тазаккур додан бамаврид аст, ки стипендияи ба номи Д.И.Менделеев бо мақсади ҳавасмандгардонии донишҷӯёне, ки  фаъолияти моҳияти иҷтимоӣ, таълимӣ ва илмӣ — тадқиқотӣ дошта доранду    дар макотиби олии Ҷумҳурии Тоҷикистон таҳсил мекунанд ва дар фаъолияти ҷамъиятӣ, тадқиқоти илмӣ, олимпиадаҳо, озмунҳо, фестивалҳо ва фаъолияти эҷодӣ ба дастовардҳои махсус ноил гардидаанд,  таъсис дода шудааст.