ТАҒЙИРОТ БА КОДЕКСИ ҲУҚУҚВАЙРОНКУНИИ МАЪМУРӢ

     Душанбе, 13 декабр.(АМИТ «Ховар», Марзия Саидова).-Масъала дар бораи ҳамроҳшавии Ҷумҳурии Тоҷикистон ба Аҳдномаи Созмони умумиҷаҳонии моликияти зеҳнӣ оид ба иҷро ва фонограммаҳо дар ҷаласаи навбатии Шӯрои Маҷлиси намояндагони Маҷлиси Олии ҷумҳурӣ, ки 13 декабр таҳти раёсати муовини аввали Раиси Маҷлиси намояндагони Маҷлиси Олии ҷумҳурӣ Амиршо Миралиев баргузор гардид, баррасӣ шуд.         Дар ҷаласаи Шӯрои мақоми олии қонунгузори кишвар,  ҳамчунин лоиҳаи қонунҳои Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи партовҳои истеҳсолӣ ва истеъмолӣ», «Оид ба ворид намудани тағйиру иловаҳо ба Кодекси ҳуқуқвайронкунии маъмурии Ҷумҳурии Тоҷикистон» ва лоиҳаи Дастури Маҷлиси намояндагони Маҷлиси Олии Ҷумҳурии Тоҷикистон муҳокима гардиданд.                  Аз хадамоти палатаи поёнии парлумони мамлакат ба АМИТ «Ховар» иттилоъ доданд, ки доир ба масъалаҳои зикргардида раиси кумитаи Маҷлиси намояндагон Сафаралӣ Раҷабов ва дигар аъзои Шӯро баромад намуда, ҳадафи онҳоро мутобиқ гардонидан бо дигар санад ва қонунҳои амалкунанда ва таҳкими ҳамкориҳои Ҷумҳурии Тоҷикистон бо созмонҳои бонуфузи хориҷӣ арзёбӣ карданд.          Дар анҷоми ҷаласа аъзои Шӯро аз рӯи масъалаҳои баррасишуда қарорҳои дахлдор қабул намуданд.