ТАДБИРҲОИ АМНИЯТӢ ПУРЗӮР МЕГАРДАНД

    Душанбе, 17 декабр.(АМИТ «Ховар», Марзия Саидова).-Дар рӯзҳои баргузории чорабиниҳои идонаи солинавӣ дар пойтахт тадбирҳои амниятӣ пурзӯр карда мешаванд. Тибқи қарори ба тасвибрасонидаи Раиси шаҳри Душанбе Маҳмадсаид Убайдуллоев Раёсати корҳои дохилии шаҳри Душанбе дар ҳамкорӣ бо Раёсати Кумитаи давлатии амнияти миллии  Ҷумҳурии Тоҷикистон оид ба шаҳри Душанбе  муваззаф шудаанд, ки дар рӯзҳои ташкил ва баргузории чорабиниҳои солинавӣ ҷиҳати таъмини амнияти шаҳрвандон ва ҳифзи тартиботи ҷамъиятӣ чораҳои иловагӣ андешанд.         Ҳамзамон, аз сокинони шаҳри Душанбе хоҳиш шудааст, ки дар рӯзҳои ташкил ва баргузории чорабиниҳои солинавӣ талаботи қонуният, тартиботи ҷамъиятӣ, Маромномаи сокини пойтахт ва қоидаҳои тартиботи ҷамъиятӣ, ободонӣ ва санитарӣ дар шаҳри Душанберо қатъиян риоя кунанд.        Тибқи ин қарор муассисаҳои марбутаи пойтахт муваззаф шудаанд, ки ҷиҳати таъмини майдону хиёбонҳои шаҳр бо унсурҳои ороишии барқӣ, хусусан гузоштани конструксияҳои ороишӣ бо ливоҳои ранга чораҳои мушаххас андешанд.      Дар қарор омадааст, ки роҳбарони вазорату идораҳо, инчунин корхонаву муассиса ва ташкилотҳои дар ҳудуди пойтахт мавҷудбуда, ороиши идонаи иморату иншооти ба онҳо вобасташударо то 27 декабри соли 2010 ба анҷом расонанд.