ЗИЁДШАВИИ ЧОРВО БА НАРХ ТАЪСИР НАРАСОНД, ЧАРО?

Душанбе, 29 декабр. (АМИТ «Ховар», Лаззат Диловарзод).- Бино ба маълумоти Раёсати чорводории Вазорати кишоварзӣ, то 1 -уми декабри соли 2010  дар ҳамаи сохторҳои хоҷагидории ҷумҳурӣ  саршумори чорвои калон ба 1 млн.865 ҳазор сар расонида шудааст, ки нисбат ба соли гузашта 28 ҳазору 500 сар зиёд аст. Дар ҳамин давра  (январ — ноябр), саршумори бузу гӯсфанд 177 ҳазору 400 сар ё 4,2 фоиз, саршумори мурғ 552 ҳазору 600 сар ё 13,7 фоиз афзудааст.    Ба иттилои ҳамин манбаъ, аз саршумори умумии чорво 91,8 фоизи чорвои калони шохдор ва 82,4 фоизи чорвои хурд (бузу гӯсфанд)  ба хоҷагиҳои аҳолӣ рост меояд.    Афзоиши саршумори чорвои калон дар хоҷагиҳои вилояти Хатлон 2 фоиз, ВМКБ — 1,3, вилояти Суғд — 0,4 ва НТҶ 2,2 фоизро ташкил дод. Бо вуҷуди он ки саршумори чорвою парранда сол то сол зиёд мегардад, нархи маҳсулоти онҳо дар бозорҳои кишвар рӯ ба афзоиш аст ва ба гуфти иқтисодшинос Ҳоҷимуҳаммад Умаров чунин худсарона боло бурдани нарх ғайр аз манфиатҳои шахсӣ асосҳои  илмӣ надорад, ки он бояд  пешгирӣ карда шавад.