1 МЛН. 40 ҲАЗОР СОМОНӢ БАРОИ ТАРМИМИ ЁДГОРИҲОИ ТАЪРИХӢ

   Душанбе, 20 январ. (АМИТ «Ховар», Дилшодаи Ҷонмард). – «Дар соли 2011 аз буҷаи давлатӣ 1 миллиону 40 ҳазор сомонӣ барои тармими ёдгориҳои таърихӣ ба Вазорати фарҳанг ҷудо шудааст, ки ин нисбат ба соли гузашта 100 ҳазор сомонӣ зиёд мебошад»,- иброз дошт дар нишасти матбуотӣ 19 январи соли ҷорӣ муовини аввали вазири фарҳанги мамлакат Миралӣ Достиев.   Вай зикр намуд, ки имрӯз дар қаламрави ҷумҳурӣ ду ҳазору 20 ёдгории таърихӣ мавҷуд аст, ки ҳамасола мутахасисон аз аҳволи онҳо хабар мегиранд ва ба мақомоти маҳаллӣ дар тармими онҳо маслиҳат медиҳанд.   Мувофиқи Қарори Ҳукумати Ҷумҳурии Тоҷикистон барои иншооти сохтмони асосӣ танҳо маблағи 450 ҳазор пешбинӣ шудааст. Аз маблағи зикргардида 420 ҳазор сомонӣ барои сохтмони Қасри фарҳанги ноҳияи Нуробод ва 30 ҳазор сомонӣ барои корҳои лоиҳакашии иншооти дар солҳои наздик аз ҷониби вазорати фарҳанг сохташаванда пешбинӣ шудааст.