«ҲАҚИҚАТИ СУҒД» ҲАФТАЕ СЕ МАРОТИБА НАШР МЕГАРДАД

Душанбе, 7 январ. (АМИТ «Ховар», Бекназари Абӯбакр). — Бо дастгирии мақомоти иҷроияи ҳокимияти давлатии вилояти Суғд ҷиҳати беҳтар намудани дастрасӣ ба иттилоот, инъикоси саривақтии рӯйдоду воқеаҳои давр ва беҳтар намудани фазои иттилоотии вилоят сар аз соли 2011 рӯзномаи вилоятии «Ҳақиқати Суғд» ҳафтае 3 маротиба — рӯзҳои сешанбе, панҷшанбе ва шанбе бо теъдоди беш аз 5 ҳазор нусха ба табъ мерасад. Аз хадамоти матбуоти раиси вилояти Суғд ба АМИТ «Ховар» иттилоъ доданд, ки ин тадбир бо ташаббуси бевоситаи раиси вилояти Суғд Қоҳир Расулзода амалӣ гардида, то ин дам рӯзномаи мазкур ҳафтае 2 маротиба нашр мегашт. Алҳол дар ин нашрияи мақомоти иҷроияи ҳокимияти давлатии вилоят 27 нафар фаъолият менамоянд, ки 15 нафарашон эҷодкорон мебошанд. Зикр бояд кард, ки мақомоти иҷроияи ҳокимияти давлатии вилоят ҳамчунин муассиси рӯзномаҳои «Суғд ҳақиқати» бо забони ӯзбекӣ ва «Согдийская правда» бо забони русӣ низ мебошад, ки ин нашрияҳо алҳол ҳафтае 2 маротиба нашр мешаванд. Умуман, солҳои охир ҷиҳати пешрафти соҳаи матбуот ва иттилоотонӣ дар вилоят тадбирҳои амиқ роҳандозӣ мегарданд. Алҳол дар маркази вилоят бунёди Кохи матбуот, ки аз 13 ошёна иборат аст, босуръат идома дорад ва ин иншооти бузург дар арафаи таҷлили 20-солагии Истиқлолияти давлатии Ҷумҳурии Тоҷикистон мавриди баҳрабардорӣ қарор гирифта, ба беҳтар шудани шароитҳои корӣ ва сифати чопи нашрияҳо мусоидат хоҳад намуд.