135 ҲАЗОР ГЕКТАР АЗ ОФАТ ҲИФЗ ШУД

   Душанбе, 26 январ. (АМИТ «Ховар», Лаззат Диловарзод).- Кумитаи ҳифзи муҳити зисти назди Ҳукумати ҷумҳурӣ дар доираи барномаи давлатии «Барқарорсозии стансияҳои обуҳавосанҷӣ ва дидбонгоҳҳои обченкунии ҶТ дар соли 2007 — 2016» 7 адад стансияи обуҳавосанҷӣ, 11 дидбонгоҳи обченкунӣ, 13 стансия ва дидбонгоҳи обченкунии ВМКБ барқарор шуданд,- иброз дошт раиси Кумитаи ҳифзи муҳити зист Талбак Салимов дар конфронси матбуотӣ ба хабарнигорон. Мавсуф ҳамчунин иброз намуд, ки ҷиҳати таъмини барномаи «Барқарорсозӣ ва таъмини корҳои зидди ҷолаи ҶТ дар солҳои 2007 — 2012» ба миқдори 4 млн. 800 ҳазор сомонӣ маблағ ҷудо гардида, стансияҳои радиолокатсионии ноҳияҳои Турсунзода, Ҳисор, Ёвон ва Ҷалолиддини Румӣ ба реҷаи худкор (автоматӣ) гузаронида шуданд.   Дар соли 2010 майдони 135 ҳазор гектар замини ноҳияҳои Ҳисор, Шаҳринав, Турсунзода аз офатҳои табии ҳифз гардид ва аз ин ҳисоб хоҷагиҳои ин ноҳияҳо беш аз 10 млн. сомонӣ маблағ фоидаи иқтисодӣ гирифтанд. Дар соли 2010 ҳамчунин ба чандин мақолаҳои иғвоангези олимони соҳаи экологии давлатҳои ҳамсоя ҷавобҳои илман асосноки олимону мутахассисони соҳа ба табъ расонида шуд,- афзуд раиси кумитаи мазкур.