15,1 ФОИЗ АФЗУДАНИ МУЗДИ КОР

     Душанбе, 13 январ. (АМИТ «Ховар», Дилшодаи Ҷонмард). – Дирӯз дар Вазорати меҳнат ва ҳифзи иҷтимоии аҳолии ҶТ маҷлиси ҷамъбасти сол баргузор гардид. Вазири меҳнат ва ҳифзи иҷтимоии аҳолӣ М.Маҳмадаминов иброз дошт, ки тӯли сол 8 лоиҳаи Қонунҳои ҶТ, 1 лоиҳаи қарори Маҷлиси намояндагони Маҷлиси Олии ҶТ, 5 лоиҳаи Фармонҳои Президенти ҶТ, 10 лоиҳаи Қарорҳои Ҳукумати ҶТ таҳия ва пешниҳод гардид.     М.Маҳмадаминов иброз дошт, ки тибқи Фармонҳои Президенти Ҷумҳурии Тоҷикистон «Дар бораи тадбирҳои тақвият додани сатҳи ҳифзи иҷтимоии аҳолӣ, зиёд намудани андозаи ҳадди ақали музди мехнат ва нафақа», «Дар бораи тадбирҳои тақвият додани сатҳи ҳифзи иҷтимоии аҳолӣ ва зиёд намудани маоши вазифавии кормандони муассисаю ташкилотҳои буҷетӣ, нафақаҳо ва стипендияҳо» далели дар амал татбиқ гардидани тадбирҳо дар самти дастгирии кормандони соҳаи иҷтимоӣ мебошад.    Дар натиҷа соли 2010 музди миёнаи ҳармоҳаи номиналии кор, ки ба кормандони кироякор пардохта шуд, 358,99 сомониро ташкил дода, нисбат ба моҳи октябри соли гузашта 15,1 фоиз афзудааст.    Ҳамчунин вазир иброз дошт, ки тайи ин муддат ба мақомоти шуғли аҳолӣ 94 197 нафар шаҳрвандон доир ба масъалаҳои шуғл муроҷиат намуданд, ки аз ин ба 38 591 нафар мақоми бекорӣ дода шуд.         Тавассути татбиқи чорабиниҳои Барномаи мусоидат ба шуғли аҳолӣ дар соли 2010 дар давраи баррасишаванда дар маҷмӯъ 32 016 нафар шаҳрвандон бо ҷойҳои корӣ таъмин гардиданд, ки 114,1 фоизи нақшаи барномаро ташкил медиҳад. Дар асоси шартномаҳои тарафайн бо корхонаву ташкилотҳо 6645 нафар ба корҳои ҷамъиятӣ ва 9141 нафар дар марказҳои таълимии мақомоти шуғли аҳолӣ ба омӯзиши касбӣ фаро гирифта шуданд.