37 ҲАЗОРУ 220 МЕТР ХАТИ ҲАВОИИ НЕРӮИ БАРҚ

   Турсунзода, 10 январ.(АМИТ «Ховар», Ҳотам Рабиев).- Соли сипаригардида барои кормандони ҶСШК «Шабакаҳои барқи Турсунзода» бобарор буд. Маҳз дар ҳамин сол зеристгоҳи «Равшан», ки яке аз калонтарин зеристгоҳҳо дар ҷумҳурӣ аст, бо трансформаторҳои пуриқтидор ва тобовар таъмин гардид. Дар ҳудуди корхона сехи таъмири трансформаторҳо ба фаъолият шурӯъ намуд, чандин биноҳои нав бунёд гардида, шароити кории кормандони шабакаҳои барқӣ беҳтар гардид.    Ғайр аз ин дар ҳудуди шаҳру ноҳия зиёда аз 700 адад симчӯбҳои оҳанию бетонии нав гузошта шуда, қисми дигар иваз шуданд. Панҷ мавзеи муҳоҷирнишин пурра бо симчӯбҳо таъмин гашта, ба он ҷойҳо хати интиқоли барқ кашида шуд. Тавре сармуҳандиси шабакаҳои барқи ноҳияи Турсунзода Олимҷон Лутфиддинов ба хабарнигори АМИТ «Ховар» иттилоъ дод, аз ҷониби кормандони шабакаи мазкур ба дарозии 37 ҳазору 220 метр хати ҳавоии интиқоли нерӯи барқ кашида шуда устувор гардид.