АНДОЗСУПОРАНДАГОНИ БЕҲТАРИН МУАЙЯН ГАШТАНД

   Душанбе, 14 январ. (АМИТ «Ховар», Дилшодаи Ҷонмард).- Таҳлилҳои гузаронидаи мутахассисони Кумитаи андоз дар соли 2010 дар байни андозсупорандагон нишон медиҳанд, ки баъзе соҳибкорон шароити кунунии Тоҷикистонро ҳамчун марҳилаи созандагиву бунёдкорӣ хуб дарк намуда, дар ҷамъоварии андозҳо ва дигар пардохтҳои ҳатмӣ ҳисса мегузоранд. Бо мақсади рӯҳбаланд намудани чунин андозсупорандагон ва баланд бардоштани сатҳи фарҳанги андозсупории онҳо фармони раиси Кумитаи андози назди Ҳукумати Ҷумҳурии Тоҷикистон дар бораи муайян кардани андозсупорандаи беҳтарини соли 2010 ба тасвиб расид. Дар асоси фармони зикршуда комиссияи махсус таъсис шуд. Бо риояи талаботи меъёрҳои муқарраршудаи фармони мазкур аз ҷониби комиссия Ҷамъияти саҳомии пӯшидаи «Индиго Тоҷикистон», Ҷамъияти саҳҳомии кушодаи «Агроинвестбонк» ва корхонаи муштараки «Зарафшон» ҳамчун андозсупорандагони беҳтарини соли 2010 интихоб гардиданд.       Инчунин бо мақсади ҳавасманд гардонидани кормандони соҳа ва хулосаи комиссия дар соли сипаргашта «Беҳтарин нозири андози сол» низ муайян шуда, 12 нафар нозирон аз мақомоти андоз бо маҳорати кордониву савияи баланди дониши соҳавӣ ҳамчун беҳтарин нозири андози соли 2010 бо шаҳодатномаи Кумитаи андоз сарфароз гардонида шуданд.