БАРҚИЯИ ҲАМДАРДИИ Э. РАҲМОН БА УНВОНИ Д.МЕДВЕДЕВ

              Президенти  Ҷумҳурии  Тоҷикистон  Эмомалӣ  Раҳмон  субҳи  имрӯз ба  унвони  Президенти  Федератсияи  Русия  Дмитрий  Медведев  барқияи  ҳамдардӣ  фиристод, ки дар  он,  аз  ҷумла,  гуфта  мешавад:            «Дмитрий  Анатолйевичи  мӯҳтарам,  хабари содир шудани   амалиёти  ваҳшиёнаи террористӣ дар  майдони  ҳавоии «Домодедово» — и  Маскав тамоми  сокинони   Тоҷикистонро  ба  қаҳру  ғазаб  овард. Онҳо  ин амали  террористиро  шадидан  маҳкум  менамоянд. Тавре  ки  маълум  аст,  дар  натиҷаи ин амали террористӣ   одамони  бегуноҳ  ҳалоку  маҷрӯҳ  гардиданд, ки  дар байни онҳо  шаҳрвандони  Ҷумҳурии  Тоҷикистон  низ  ҳастанд.             Ин  воқеа бори  дигар зарурати  ривоҷ додани  ҳамкории ҳамаҷонибаро   барои  тақвияти муборизаи  самарабахш ба  муқобили  ин  зуҳуроти  глобалии бадхоҳӣ  ва барҳам додани  шароитеро таъкид менамояд,  ки  ба  паҳн  гардидани  терроризм  мусоидат   хоҳад  кард.             Дмитрий  Анатолйевич,   аз  Шумо  хоҳишмандам,  ҳамдардии  моро  ба  аҳли оила  ва  хешу таборони  шахсони  ҳалокгардида  бирасонед. Мо  ба  ғаму  андӯҳи  наздикони  ҳалокшудагон  ва  маҷрӯҳгардидагон  шарик  мебошем».             Дар  ин  бора  аз  Хадамоти  матбуоти  Президенти  Ҷумҳурии  Тоҷикистон  ба  АМИТ «Ховар» хабар  доданд.